Interlingua

Language Interlingua - ISO 639: INA, ia; NISO Z39.53: int Resources: Linguistics' category about Interlingua - Other: Union Mundial pro Interlingua Countries [TLD]: None; international auxiliary language

Que es interlingua?

Interlingua es un lingua naturalistic basate super le elementos commun de septe major linguas europee. Per consequente, le vaste majoritate de su vocabulario es de origine greco-latin. Le vocabulario es determinate per un methodologia, non dictate per un organisation. Assi, interlingua automaticamente evolve secundo su "linguas-fontes".

Communication international - facile

Interlingua es designate como un secunde lingua pro communication international. Gratias a su vocabulario vermente international e grammatica minimalisate, interlingua es multo facile a apprender, pro uso active e passive, pro le majoritate de personas con un lingua europee como lingua materne.

In addition, interlingua es le unic lingua auxiliar que es facilemente comprendite, sia parlate sia scripte, per centos de milliones de personas qui nunquam lo ha apprendite, o mesmo nunquam ha audite de illo. Isto lo da un avantage unic super altere linguas planate como Esperanto.

Function propedeutic

Apprender Interlingua es equalmente un maniera facile e amusante de ganiar plus comprehension del elementos international de tu proprie lingua materne.

Similemente, cognoscer interlingua rende plus facile apprender un altere lingua europee que incorpora le mesme base de vocabulos international.

Base scientific

Interlingua esseva primarimente publicate in 1951 per IALA (International Auxiliary Language Association), post plus de duo decennios de recercas linguistic professional e pagate. Infortunatemente, le grande sponsor de IALA moriva justo quando le projecto era finite, e le lingua nunquam recipeva fundos adequate pro promotion.

Nonobstante, interlingua ha essite usate con successo in conferentias e revistas scientific. Hodie, Internet offere nove opportunitates a interlingua.

Interlingua de IALA non debe esser confundite con le "altere" Interlingua, equalmente cognoscite como Latino sine Flexione, proponite per Giuseppe Peano in 1903.